गडहिंग्लज प्रतिनिधी : भडगाव (ता. गडहिंग्लज) येथील मलगोंडा रामगोंडा पाटील (वय ८०) यांचे मरणोत्तर नेत्रदान झाले. येथील अंकूर आय बँकेच्या पथकाने नेत्रदानाची प्रक्रिया पार पाडली. भडगाव गावातील गेल्या वर्षभरातील हे तिसरे नेत्रदान ठरले.
मलगोंडा पाटील यांचे आज पहाटे हृदयविकाराच्या धक्क्याने निधन झाले. त्यांच्या नातेवाईकांना गावातील चळवळीच्या कार्यकर्त्यांनी नेत्रदानाबाबत विचारणा केली. दु:खद प्रसंग असूनी सामाजिक बांधिलकी जपत पाटील कुटुंबीयांनी त्याला होकार दिला. त्यानंतर अंकूर आय बँकेच्या पथकाला पाचारण करण्यात आले. त्यांनी भडगाव येथे जाऊन नेत्रदानाची प्रक्रिया पार पाडली. भडगावातील हे एकूण सातवे तर चळवळीतील १०८ वे नेत्रदान आहे. मलगोंडा पाटील यांच्या मागे पत्नी, मुलगा, सूना, नातवंडे असा परिवार आहे. सोमवारी (ता.१७) तिसरा दिवस आहे.
